З днем нараджэння, “Сірэна”!

Дата: 4 ноября 2020 в 11:11, Обновлено 5 ноября 2020 в 12:12

Автор: Жданович Е. Я.

144 просмотра

З днем нараджэння, “Сірэна”!

5 лістапада адзначыў свой 24-ты дзень нараджэння клуб юных ратавальнікаў “Сірэна” Цэнтра творчасці дзяцей і моладзі Бярэзінскага раёна. Усе гэтыя гады заняткі з дзецьмі ў клубе вядзе Ірына Рыгораўна Осіпава. За пройдзеныя гады яна стала сапраўды родным чалавекам у пажарнай часці, дзе і збіраюцца на заняткі дзеці. Без перабольшвання можна сказаць, што ўсе ў часці лічаць яе за таго ж самага байца, а таму нараўне з прафесійнымі ратавальнікамі можам называць Ірыну Рыгораўну сапраўднай легендай службы.

Зададзім некалькі пытанняў нашай гераіне:

Як пачыналася для вас уся гэта “пажарная гісторыя”?
Ведаеце, ніколі б не падумала, што 24 гады буду вучыць дзяцей. У мяне ж вышэйшая тэхнічная адукацыя, я інжынер-металург. Калісь працавала тэхнолагам на заводзе “Зеніт” у Вілейцы, потым – у страхавай кампаніі, а таксама на заводзе па вытворчасці вакон. У 1996 годзе у раённым адзеле народнай адукацыі Бярэзінскага райвыканкама паўстала пытанне аб стварэнні клуба юных ратавальнікаў, і тагачасны інспектар па пажарнаму нагляду Альфер Юрый Вітальевіч запрасіў мяне працаваць з дзецьмі.
Ці было цяжка ствараць усе з “нуля”?
Ведаеце, было больш цікава. Дзеці прыходзілі актыўныя, захапляліся пажарнай справай хутка. Дзеці і зараз такія! Канечне, зараз мы маем і форму, і наглядную прадукцыю, і мноства распрацовак па рабоце з дзецьмі, і інтэрнэт падкажа цікавыя ідэі. А тады кожная гульня стваралася сваімі рукамі, шукалі грошы на форму, самой прыходзілася распрацоўваць заняткі. Нельга было страціць цікавасць дзяцей!
Ці былі думкі пашукаць іншую работу?
Не, не было. Самой было цікава працаваць: кожны год у клуб прыходзілі новыя дзеці, пачаў “шумець” цэлы маладзежны рух, узнікла маладзежная арганізацыя ратавальнікаў-пажарных. Пастаянна прыцягвалі дзяцей да дзейнасці: то конкурсы, то акцыі, то пажарны спорт, то абласны палявы лагер…
Колькі дзяцей прайшлі навучанне ў клубе за 24 гады?
Цяжка падлічыць, прыкладна 1900 чалавек. Ганаруся, што многія з іх выбралі для сябе прафесію ратавальніка: зараз у раённым аддзеле годна служаць Аляксандр Карабінеўскі, Яўген Сігуеў, Віктар Палянскі, Данііл Лапыцька і іншыя.
Як арганізавана навучанне ў клубе?
У залежнасці ад узросту дзяцей працуюць тры групы, штодзень прыходзяць дзеці пасля ўрокаў. Самыя старэйшыя займаюцца ад да 19 гадзін вечара. У клубе зараз 70 удзельнікаў, звычайна на працягу вучэбнага года прыходзяць новыя дзеці: спачатку ідуць з сябрамі “за кампанію”, проста паглядзець, а потым просяцца застацца. Прыемна, што больш за палову маіх выпускнікоў – дзеці, што прыйшлі ў клуб яшчэ ў 4-5 класе і засталіся да канца школы.
Як запрашаеце дзяцей у клуб?
Звычайна ў верасні абыходжу з мерапрыемствамі ўсе гарадскія школы, расказваю дзецям, чым мы будзем займацца ў “Сірэне”. І гэта схема безадказна працуе ўжо 24 гады. Для дзяцей надзвычай важна, што на заняткі трэба прыходзіць менавіта ў пажарную часць.
Якія ўзнагароды мае клуб?
Мы добра паказваем сябе на абласных конкурсах і спаборніцтвах: да прыкладу, у 2019 годзе мы - чацвертыя па пажарна-выратавальным спорце ў першынстве Мінскай вобласці, таксама наша – 3-е месца ў практыкаванні «Пад’ем на 2 паверх вучэбнай вежы”. А у 2014 годзе мы сталі нават другімі ў вобласці ў першынстве! Мінулыя гады таксама адзначаны кубкамі і дыпломамі ў розных конкурсах і абласных спаборніцтвах.
Якімі актывістамі ганарыцеся зараз?
Іх многа! Асабліва парадавалі ў гэтым годзе Паліна Цыбулька і Паліна Вараб’ева. Іх запрасілі на абласныя зборы ў Слуцк: тут рыхтавалі каманду ад Мінскай вобласці для спаборніцтваў юных ратавальнікаў у лагеры “Зубраня”. Па выніках збораў Вараб’ева Паліна трапіла ў абласную каманду.
Ірына Рыгораўна, дзякуй вам за самаадданасць справе, энтузіазм, творчасць і энергічнасць. З днем нараджэння, “Сірэна”!