Березинский РОЧС информирует
На пажары загінула жанчына
У мінулы чацвер днем бяда напаткала сям’ю з в.Альхоўка Бярэзінскага сельсавета: у агні загінула 55-гадовая жанчына, яе муж з апекамі знаходзіцца ў раённай бальніцы. Галоўнай версіяй здарэння на дадзены момант з’яўляецца неасцярожнасць пры абыходжанні з агнём пры курэнні саміх гаспадароў домаўладання. Дарэчы, гэта ўжо трэці выпадак гібелі людзей у агні у гэтым годзе: 10 лютага ў Пагосце з-за парушэнняў норм бяспекі пры карыстанні электрасеткамі здарыўся пажар і загінулі дзве жанчыны.
Ратавальнікі нагадваюць: нядбайна кінуты недакурак здольны ператварыць у попел не толькі жыллё чалавека, але і яго жыццё. Значна пагаршае сітуацыю ўжыванне спіртных напояў: часта бывае так так, што людзі падчас задымлення не могуць прачнуцца і гінуць у першую чаргу ад дзеяння чаднага дыму. Пазбаўцеся ад звычкі курыць у доме, пакідайце недакуркі толькі ў незгаральных банках.
Выкананне самых простых мер пажарнай бяспекі зберажэ ваш дом ад пажару: адрамантуйце печы, трымайце ў належным стане электрасеткі і электраабсталяванне, схавайце запалкі ад дзяцей. Пры любой надзвычайнай сітуацыі неадкладна тэлефануйце па нумарах 101 ці 112.
Вольга Данэйка, інспектар прапаганды Бярэзінскага РАНС
