Каб пазбегнуць трагедыі на вадзе…
Вясна актыўна ўступае ў свае правы, і цёплае надвор'е спрыяе інтэнсіўнаму раставанню лёду на вадаёмах. Як вынік – у Мінскай вобласці пачалі рэгістравацца выпадкі ратавання людзей з ледзянога плену. Каб не дапусціць трагедыі на вадаёмах Бярэзінскага раёна, службы ратавання актыўна інфармуюць насельніцтва аб забароне выхаду на лёд, які ўведзены з 1 сакавіка на тэрыторыі Мінскай вобласці. Амаль штодня праводзяцца рэйды па ўлюбёных людзьмі месцах рыбнай лоўлі – ратавальнікі ўжо наведалі вядомы ўсім кар’ер, вадаёмы на тэрыторыі баз адпачынку раёна, азёры ў аг.Уша, аг.Поплавы і іншыя. Як правіла, людзі з разуменнем ставяцца да важнай інфармацыі і пакідаюць лёд. Не ўсе, як высветлілася, ведаюць пра забарону, і са здзіўленнем рэагуюць на новую інфармацыю - лёд, па іх словах, яшчэ досыць моцны. Але ж да пары-да часу…
Рэйды будуць працягвацца, бо іх асноўная мэта - папярэджанне бяды, зберажэнне жыцця людзей. Таксама ведайце, што за невыкананне патрабавання зацікаўленых служб пакінуць лед грамадзяне будуць несці адміністратыўную адказнасць па ўсей строгасці закона.
Вольга ДАНЭЙКА, інспектар прапаганды Бярэзінскага РАНС
