Березинский РОЧС информирует: Дзе неасцярожнасць, там і бяда
Дзе неасцярожнасць, там і бяда
У зімовы час колькасць пажараў у жылым сектары павялічваецца. Гараць дамы, лазні, гаспадарчыя пабудовы. Надзвычай часта прычынай узгарання становяцца няспраўныя печы альбо парушэнні людзьмі правілаў карыстання імі. Дакладней, неасцярожнасць і абыякавасць людзей могуць прывесці да пажару, значных матэрыяльных страт і нават чалавечым ахвярам. Да прыкладу. У мінулым 2021 годзе ў раёне адбыліся 28 пажараў, амаль палова з іх – 11 выпадкаў - адбыліся па вышэй названай прычыне. Найбольш тыповыя “карціны”, што бачаць ратавальнікі падчас абследвання жылля людзей, наступныя: печы з расколінамі, непатынкаваныя коміны, наяўнасць рэчаў на гарачых ляжанках, няспраўныя дзверцы печы, недастатковых памераў металічны ліст на падлозе ля топліўнай дзверкі. Усе прыведзеныя парушэнні здольныя прывесці да пажару.
Памятайце:
- у печы не павінна быць расколін і шчылін, а комін павінен мець добрую цягу і быць пабелены вапнавым растворам. Робіцца гэта для таго, каб на белым фоне можна было заўважыць якія з'яўляюцца з часам расколіны;
- печ і дымавая труба ў месцах злучэння з драўлянымі перакрыццямі павінны мець патаўшчэнне цаглянага мура - разделку;
- каб вуглі, што выпалі з печкі, не прывялі да пажару, прыбіце перад топкай на драўляным падлозе металічны ліст памерамі 50х70 см;
- ні ў якім разе не выкарыстоўвайце пры падпалцы лёгкаўзгаральныя і гаручыя вадкасці;
- не пакідайце адчыненымі топачныя дзверцы і топячы печ без нагляду, гэта прамы шлях да пажару;
- трымайце не менш як за паўтары метры ад печы вопратку, мэблю, дровы і іншыя гаручыя матэрыялы;
- попел і перагарэлае вуголле выкідвайце не бліжэй за 10 метраў ад будынкаў;
- не пакідайце без нагляду печку, што топіцца, і не дазваляйце дзецям самастойна іх распальваць.
Памятайце пра тэлефоны службы ратавання: 101, 112
На фотаздымках вы можаце бачыць наступствы, што маюць месца быць з-за неасцярожнасці і абыякавасці людзей пры эксплуатацыі печаў.
Вольга Данэйка, інспектар прапаганды Бярэзінскага РАНС
