Ледзь не стаў ахвярай агню…
Не прайшло і месяца з таго здарэння, калі ў адной з кватэр Беразіно пры задымленні ледзь не загінулі трое чалавек (матэрыял у раённай газеце ад 7.10.2017 года). Тады звычка выпіць і пакурыць у ложку магла каштаваць людзям іх жыцця. І вось - гісторыя паўтарылася. Удзень 23 кастрычніка ў шматкватэрным доме па вуліцы Перамогі адбылося ўзгаранне. Добра, што суседзі своечасова заўважылі дым і патэлефанавалі ў службу ратавання. Пажарныя дапамаглі выйсці з задымленнай кватэры 55-гадоваму мужчыне. Гаспадар, здаецца, добра і не ўсведамляў, што адбываецца. Як, мабыць, і не разумеў, што формула “спіртное+цыгарэта ў ложку” – смяротна небяспечная! Агнем пашкоджаны пасцельныя прыналежнасці, сам мужчына не пацярпеў.
Дым на пажары – яшчэ страшней агню. Як правіла, людзі, што спяць пры ўзгаранні, гінуць менавіта з-за атраўлення ўгарным газам. Так і ў дадзеным выпадку: яшчэ б хвілін пяць-сем моцнага сну ў задымленнай кватэры – і чалавека маглі б не выратаваць…
538 чалавек у нашай краіне загінула на пажарах у мінулым годзе, васьмера з іх - дзеці. Страшная лічба… Не стаць ахвярай агню – лёгка: не курыце ў доме, адрамантуйце печы і электраправодку, не пакідайце малалетніх дзяцей без нагляду.
Вольга Данэйка, інспектар прапаганды Бярэзінскага РАНС
